PUISI BUWIT NGURIT
BUWIT NGURIT
Antuk : I Wayan Suardika
Yening kaelingin ring manah
Meled pesan ngarauhin genahnyane
Nyingakin pasuecan Hyang Widhi
Kawastanin Desa Buwit
Katon angob widang palemahan
Rawit ngawit carike jimbar
Slisir nyisir anginnyane ngesir
Paras parus toyane membah
Carike kapanggihin malembat-lembat asri
Sakadi Hyang Dewi Sri nyalantara
Ngicenin pasuecan waranugraha
Pari pantun amertaning jagate
Sang Hyang Surya sampun matangi
Nyuryaning jagate sami
Para sato pada manguci girang
Parajanane ngamargiang swadharma
Sisi kaler kidul katon angob
Nyingakin warna gadang gading
Pinaka cihna carike eling
Eling kapining pramananipun
Nenten surud-surud manah ipune
Nandurin sakancan carike jimbar
Cihna karya jatma sujati
Ngwerdiang carik Buwit sujati
Sande rauh pacang peteng
Matan ai sayan kelem
Para buron pada matilar
Maciri langite sampun peteng
Bulan sampun medal
Bintang-bintang pada galang
Ambu putih maslieran
Angin nyisir bulun kalonge
Sunar bulan nyunarin manah
Kasiramin damuh akasa
Ten wenten manah jagi matilar
Ngatonan kaluwihan peteng ring Buwit
Posting Komentar untuk "PUISI BUWIT NGURIT"